DENGBÊJ SALIHÊ QUBÎNÎ JIYAN Û BERHEM

Abstract

Dengbêjî, di Çanda Kurdî ya Devkî de xwedî roleka girîng û taybet e. Bi saya dengbêjiyê ziman, adet, tore û gelek hêmanên çanda kurdî li ser piya mane, ji nifşekî derbasî nifşekî din bûne û heya dema me hatine. Lehengên hunera dengbêjiyê jî bêguman dengbêj in. Dengbêj, nûnerê vê hunerê ne. Ew bi rêya bîra xwe ya xurt, kesayeta xwe ya civakî û edebî vê rola xwe bi awayekî serkeftî pêk tînin. Dengbêj, di berhemên xwe de gelek hêmanên cuda û bireng yên disiplînên wek edebiyatê, dîrokê û civaknasiyê jî dihewînin, ji ber vê yekê em dikarin bibêjin her dengbêjek di heman demê de di civakê de rola edebiyatnasekî, diroknasekî û civaknasekî jî dilîze. Di vê xebata xwe ya bi navê Salihê Qubînî (Jiyan û Berhem) de me xwest ku em berê xwe bidin herêma Xerzanê û guhê xwe bidin dengbêjên vê herêmê. Bitaybetî jî em li ser dengbêjê herêmê yê herî navdar, ku di heman demê de serenavê teza me ye jî, Salihê Qubînî rawestin. Li ser jiyana wî û berhemên wî em ê dahûrîneka berfireh û kûr bikin.